مولانا نور محمد پتافي حسيني

نور محمد حسيني پتافي، مولوي: نامور عالم دين، مقرر، ليکڪ ۽ مناظر اسلام مولانا نور محمد پتافي حسينيءَ جي ڪنيت ابو الحسنين ۽ لقب حيدري آهي. هي پهرين جنوري 1968ع تي ڳوٺ سعدي ديري، تعلقي رتيديري، ضلعي لاڙڪاڻي ۾ همت علي پتافيءَ جي گهر ۾ ڄائو. ابتدائي تعليم پنهنجي ڳوٺ ۾ حاصل ڪرڻ کانپوءِ عربي ۽ فارسي تعليم مشهور عالمن مفتي محمد صالح نعيميرح، مولانا مفتي عزيز اللهرح ۽ مولانا محمد رفيق خوشنويس وٽ حاصل ڪيائين. دُوره حديث ۽ تفسير علامه مفتي محمد فيض احمد اويسي صاحب بهاولپور واري وٽ پڙهي، 1984ع ۾ پورو ڪيائين. بزرگ سيد غلام حسين شاهه قنبر واري جي هٿ تي دست بيعت ٿي کانئس روحاني فيض حاصل ڪيائين. پنهنجي مرشد جي نسبت سان پنهنجي ڳوٺ سعدي ديري ۾ مدرسه الحسينيه نور الاسلام جو بنياد رکيائين. گڏوگڏ هڪ بهترين لائبريريءَ جو قيام عمل ۾ آندائين. هن مدرسي ۾ درس و تدريس ۽ لائبريريءَ کي قيمتي ۽ ناياب ڪتابن سان سينگارڻ سان گڏ واعظن، مناظرن ۽ ديني ڪتابن لکڻ ۽ ڇپائڻ جو سلسلو به جاري رکيو. هن وقت تائين مختلف موضوعن تي 33 کان مٿي ننڍا وڏا ڪتاب لکي چڪو آهي، جن مان ڪيترا ڇپجي اهل علم ۽ ديني حلقي ۾ مقبوليت ماڻي چڪا آهن. سندس مدرسي مان ڪيترا شاگرد پڙهي ديني عالم ٿي چڪا آهن. سندس لائبريريءَ سٺين علمي لائبريرين ۾ ليکي وڃي ٿي. مولوي نور محمد پتافي عربي ٽيچر (ايڇ. ايس. ٽي) جون خدمتون سرانجام ڏيئي رهيو آهي. سندس ڇپيل ڪتابن ۾: ’الله منهنجي توبه‘، ’شانِ مصطفى و فضائل درود شريف‘، ’وسيلو سهڻي سردار دوجهان جو‘، ’فضائل اهلِ بيت الرسول صلي الله عليه وسلم‘، ’فضائل خلفاء راشدين‘، ’فضائل حج و عمره شريف‘ ۽ ’شانِ غوث اعظم رح‘ شامل آهن.

داخلا ۾ استعمال ٿيل تاريخون

1968.01.01  عيسوي

مولانا نور محمد پتافي حسيني پهرين جنوري 1968ع تي ڳوٺ سعدي ديري، تعلقي رتيديري، ضلعي لاڙڪاڻي ۾ همت علي پتافيءَ جي گهر ۾ ڄائو.

عالم - ڀاڱي جون ٻِيون داخلائون